ಸರ್ಕಾರದ ಕಾರ್ಯಕ್ರಮಗಳಿಗೆ ಸ್ಫಷ್ಟತೆ ಇದ್ದರೆ ಅವುಗಳಿಂದ ಸಾರ್ವಜನಿಕರಿಗೆ ನೆರವಾಗುತ್ತದೆ. ಆದರೆ ಸರ್ಕಾರಿ ಕಾರ್ಯಕ್ರಮಗಳು ಕಾಟಾಚಾರಕ್ಕೆ ಎಂಬಂತೆ ನಡೆದರೆ ಅವುಗಳಿಂದ ಸಾರ್ವಜನಿಕರಿಗೆ ಲಾಭವೂ ಆಗುವುದಿಲ್ಲ,ಸರ್ಕಾರದ ಉದ್ದೇಶವೂ ಈಡೇರಿದಂತಾಗುವುದಿಲ್ಲ. ಇದೇ ವರ್ಷ ಪ್ರಾರಂಭವಾದ ಹೋಬಳಿ ಮಟ್ಟದಲ್ಲಿ ಜಿಲ್ಲಾಧಿಕಾರಿಗಳಿಂದ ಸಾರ್ವಜನಿಕ ಕುಂದುಕೊರತೆಗಳ ಪರಿಶೀಲನಾ ಸಭೆ ಇಂಥ ವಿಫಲ ಕಾರ್ಯಕ್ರಮಗಳಿಗೊಂದು ಉದಾಹರಣೆ. ಉತ್ತರ ಕನ್ನಡ ಜಿಲ್ಲಾ ಮಟ್ಟದ ಜಿಲ್ಲಾಧಿಕಾರಿಗಳ ಹೋಬಳಿ ಮಟ್ಟದ ಸಾರ್ವಜನಿಕ ಕುಂದು ಕೊರತೆಗಳ ಪ್ರಗತಿ ಪರಶೀಲನಾ ಸಭೆ ಪ್ರಥಮ ಚುಂಬನಂ,ದಂತಭಗ್ನಂ ಎಂಬಂತಾಯಿತು.
ಸಿದ್ಧಾಪುರ ತಾಲೂಕಿನ ಹಲಗೇರಿ ಗ್ರಾಮ ಪಂಚಾಯತ್‌ ನಲ್ಲಿ ನಡೆದ ಈ ಸಭೆಗಾಗಿ ಸ್ಥಳಿಯಾಡಳಿತ ಎಲ್ಲಾ ವ್ಯವಸ್ಥೆಗಳನ್ನು ಮಾಡಿತ್ತು. ಸ್ವಾಗತಕ್ಕೆ ಅಂಗನವಾಡಿ ಕಾರ್ಯಕರ್ತೆಯರ ಕುಂಬಮೇಳ! ಜಿಲ್ಲಾಧಿಕಾರಿಗಳ ಸ್ವಾಗತಕ್ಕೆ ಯಕ್ಷಗಾನ ವೇಶಧಾರಿ ಹೀಗೆ ಬಾಹ್ಯ ಆಕರ್ಷಣೆಯಾಗಿ ಕಾರ್ಯಕ್ರಮ ಜಿಲ್ಲೆಯ ಗಮನ ಸೆಳೆದಂತಿತ್ತು. ಜಿಲ್ಲಾಡಳಿತದ ಪೂರ್ವತಯಾರಿಯಿಂದ ಸಾಕಷ್ಟು ಜನರೂ ಆಗಮಿಸಿದ್ದರು. ಆದರೆ ವಿಶಿಷ್ಟ ತಯಾರಿಯಿಂದ ಪ್ರಾರಂಭವಾದ ಕಾರ್ಯಕ್ರಮಕ್ಕೆ ತಕ್ಕಂತೆ ಸಾರ್ವಜನಿಕರ ಅಹವಾಲು ಹೇಳಲು ಅವಕಾಶವಾಗಲಿಲ್ಲ. ಜಿಲ್ಲಾಧಿಕಾರಿಗಳನ್ನು ಮುತ್ತಿಕೊಂಡ ಸಾರ್ವಜನಿಕರು ತಮ್ಮ ಅಹವಾಲು ಹೇಳಲು ಗೋಳಾಡಿದರು. ಜಿಲ್ಲಾಧಿಕಾರಿಗಳಿಗೆ ಸಲ್ಲಿಸಲು ತಂದ ಅರ್ಜಿಗಳನ್ನು ನೀಡಿ ವೇದಿಕೆಯಲ್ಲಿ ಏನಾಗುತ್ತಿದೆ ಎಂದು ತಿಳಿಯದ ಸಾರ್ವಜನಿಕರು ಪರದಾಡಿದರು.
ಹೋಬಳಿಮಟ್ಟದ ಕುಂದುಕೊರತೆ ಕೇಳಲು ಬಂದ ಜಿಲ್ಲಾಧಿಕಾರಿಗಳು ಸಾರ್ವಜನಿಕರಿಗೆ ಸ್ಪಂದಿಸಿದರಾದರೂ ಸಾರ್ವಜನಿಕರಿಗೆ ತಮ್ಮ ಅಹವಾಲುಗಳ ಬಗ್ಗೆ ಜಿಲ್ಲಾಧಿಕಾರಿಗಳು ನೀಡಿದ ಉತ್ತರ ಸಮಧಾನ ತರಲಿಲ್ಲ. ಪೂರ್ಣಕುಂಭ ಸ್ವಾಗತ ನೀಡಿದ ಅಂಗನವಾಡಿ ಕಾರ್ಯಕರ್ತೆಯರು ಬಿಸಿಲಲ್ಲಿ ನಿಂತು ಹೆಣಗಿದ್ದು, ಕೆಲವು ಪ್ರಮುಖ ಅಹವಾಲುಗಳನ್ನಾದರೂ ಸಾರ್ವಜನಿಕರಿಗೆ ಕೇಳುವಂತೆ ಧ್ವನಿವರ್ಧಕದ ಮೂಲಕ ಹೇಳಿಸಿ ಅವುಗಳಿಗೆ ಜಿಲ್ಲಾಧಿಕಾರಿಗಳೂ ಮೈಕ್‌ ನಲ್ಲೇ ಉತ್ತರಿಸಿದ್ದರೆ ಸೇರಿದ್ದ ಸಾರ್ವಜನಿಕರಿಗೆ ಈ ಕುಂದುಕೊರತೆಗಳ ಪರಿಶೀಲನೆ ಅರ್ಥವಾಗುತಿತ್ತೇನೋ. ಒಟ್ಟಾರೆ ಬಹುನಿರೀಕ್ಷೆಯ ಜಿಲ್ಲಾಮಟ್ಟದ ಕಾರ್ಯಕ್ರಮ ಹೋಬಳಿಮಟ್ಟದ ಕುಂದುಕೊರತೆಗಳ ಪರಿಶೀಲನಾ ಸಭೆಯ ಪ್ರಾರಂಭೋತ್ಸವ ಸರ್ಕಾರದ ಅಗ್ಗದ ಕಾರ್ಯಕ್ರಮ ಎನ್ನುವ ಟೀಕೆಗೆ ಒಳಗಾಗುವಂತಾಯಿತು. ಹೋಬಳಿ ಮಟ್ಟದ ವೈಯಕ್ತಿಕ ಸಮಸ್ಯೆಗಳಷ್ಟೇ ಅಲ್ಲದೆ ಸಾರ್ವಜನಿಕ ಅಹವಾಲುಗಳಿಗೂ ಸರಿಯಾದ ಉತ್ತರ ಪರಿಹಾರದ ಭರವಸೆ ದೊರೆಯದಿರುವುದು ಈ ಕಾರ್ಯಕ್ರಮದ ವಿಫಲತೆಯ ವಿಷಯ ವೈರಲ್‌ ಆಗುವುದಕ್ಕೆ ಸೀಮಿತವಾದಂತಾಗಿದೆ.
