ಸದ್ದಾಗದ ಸಂತೆ

ಪಕ್ಕದ ಜನತಾ ಬಜಾರ್ ಭಣಗುಡುತ್ತಿತ್ತು ಸದ್ದು ಗದ್ದಲದ ಸಂತೆಯೊಳಗೆ/
ಮನವೊಂದು ಬಿಕೋ ಎನ್ನುತ್ತಿತ್ತು ಉತ್ಸಾಹ ನೆರೆದಿದ್ದ ಸಂತಸದೊಳಗೆ//

ಎರಡು ಪದಗಳ ಒಂದೇ ತರಹದ ಅರ್ಥ ಬೇರೆ ಬೇರೆ ಭಾವ ಹುದುಗಿದ ಅಂತರಂಗ/
ಬೆಂಬಿಡದ ಒಂಟಿತನ ಬೇಸರ ಕಾಡದು ಬಯಸಿ ಒಂದಾದ ಏಕಾಂತದೊಳಗೆ//

ರೂಪಾಯಿ ಕಟ್ಟಿನ ಮೇಲೆ ದುಂಡು ಎಸೆದು ಆಟ ಪ್ರತಿ ಬಾರಿ ತಪ್ಪುವ ಗುರಿ/
ಏಕಾಗ್ರತೆಯೆ ಇಲ್ಲ ನನ್ನಲ್ಲಿ ಕಳೆದು ಹೋಗಿರುವೆ ಚಂಚಲದ ನಡುಕದೊಳಗೆ//

ಮೇಲೆ ಕೆಳಗೆ ಸುತ್ತುವ ಚಕ್ರಗಳ ಬಂಡಿ ಎಲ್ಲೂ ಹೊತ್ತು ಒಯ್ಯಲಿಲ್ಲ ನನ್ನ/
ತಲೆ ತಿರುಗಿ ಬಿದ್ದ ಅನುಭವ ಅರ್ಥ ಆಗಲಿಲ್ಲ ಅಲ್ಲಿಯ ಕಿರುಚಾಟದೊಳಗೆ//

ಭಾರವಾದ ಹೃದಯ ಹಾತೊರೆಯುತ್ತಿದೆ ಯಾವುದಕ್ಕೆ ಎನ್ನುವುದೆ ಇನ್ನೂ ಪ್ರಶ್ನೆ/
ಸದ್ದಿಲ್ಲದೆ ಹೊರ ಬಂದಾಗ ಏನೋ ಸಮಾಧಾನ ಒಂದಿಷ್ಟು ನಿರುತ್ಸಾಹದೊಳಗೆ//

*ಬಸವರಾಜ ಕಾಸೆ*
7829141150
pradeepbasu68@gmail.com