ಸುರಿಯುವ ಮಳೆಯ ನಡುವೆ ನಡೆದ ಜಂಗೀ ಬಿಂಗಿ! ಗಮನಸೆಳೆದ ನೆಲಮೂಲದ ಅನನ್ಯ ಆಚರಣೆ! ಇದು ಮಲೆನಾಡಿನ ಆರಿದ್ರಮಳೆ ಹಬ್ಬದ ವಿಶೇಶ

ಮಲೆನಾಡಿನ ಮೂಲನಿವಾಸಿ ಬಹುಸಂಖ್ಯಾತರು ಆಚರಿಸುವ ಮಲೆನಾಡಿನ ವಿಶಿಷ್ಟ ಹಬ್ಬಗಳಲ್ಲಿ ಆರಿದ್ರಮಳೆ ಹಬ್ಬವೂ ಒಂದು. ಭಾರತೀಯ ಋತುಗಳನುಸಾರ ವರ್ಷ ಋತುವಿನ ಮೊದಲು ಆಚರಿಸುವ ಈ ಆರಿದ್ರಮಳೆ ಹಬ್ಬದ ರೀತಿ-ನೀತಿಗಳು ತುಸು ಭಿನ್ನವಾದರೂ ಆಚರಣೆ ಉದ್ದೇಶ ಒಂದೇ. ಕರಾವಳಿ, ಮಲೆನಾಡಿನ ದೀವರೊಂದಿಗೆ ಈ ನೆಲಮೂಲದ ಮೂಲನಿವಾಸಿಗಳು ಆಚರಿಸುವ ಈ ಆರಿದ್ರಮಳೆ ಹಬ್ಬಕ್ಕೆ ಹನಿ ಹಬ್ಬ ಎಂದೂ ಕರೆಯುತ್ತಾರೆ.

ಕುಮಾರ ರಾಮ-

ಧೀರ ಚಾರಿತ್ರಿಕ ಪುರುಷ ಕುಮಾರರಾಮನನ್ನು ಕರಾವಳಿ, ಮಲೆನಾಡು, ಬಯಲುಸೀಮೆ ಎನ್ನದೆ ರಾಜ್ಯದಾದ್ಯಂತ ವಿಭಿನ್ನವಾಗಿ ನಾನಾ ಸಂದರ್ಭಗಳಲ್ಲಿ ಪೂಜಿಸಿ- ಆರಾಧಿಸುತ್ತಾರೆ. ಕರಾವಳಿಯ ಹೊನ್ನಾವರದ ಅನಿಲಗೋಡು ಕುಮಾರರಾಮ ದೇವಾಲಯದಿಂದ ಹಿಡಿದು ಕೊಪ್ಪಳ ಜಿಲ್ಲೆಯ ಕೆಲವೆಡೆ ಇರುವ ಕುಮಾರರಾಮನ ದೇವಾಲಯಗಳ ವರೆಗೆ ಪ್ರಾದೇಶಿಕವಾಗಿ ತುಸು ಮಾರ್ಪಾಡುಗಳೊಂದಿಗೆ ಕುಮಾರ ರಾಮನನ್ನು ಹನಿಹಬ್ಬ, ಬಂಡಿಹಬ್ಬ ಸೇರಿದಂತೆ ಅನೇಕ ಉತ್ಸವಗಳಲ್ಲಿ ವಿಭಿನ್ನವಾಗಿ ಪೂಜಿಸಿ ಆರಾಧಿಸಲಾಗುತ್ತದೆ.

ಸೇನೆಯ ಹಿನ್ನೆಲೆ-

ಹಳೆಪೈಕ ಅಂದರೆ ಆದಿಸೈನಿಕ ( ದೀವರು| ಈಡಿಗ) ರಾಗಿದ್ದ ಈ ನೆಲದ ಮೂಲನಿವಾಸಿಗಳು ರಾಜರು, ಸಾಮಂತರ ಜೊತೆಗೆ ಸೈನಿಕರಾಗಿ ಕೆಲಸಮಾಡುತಿದ್ದ ಸಮಯದಲ್ಲಿ ಮಳೆಗಾಲದ ಯುದ್ಧ ವಿರಾಮದ ಕಾಲದಲ್ಲಿ ತಿಂಡುಂಡು, ಕೃಷಿಕಾಯಕ ಮಾಡುತ್ತಾ ತಮ್ಮ ಪ್ರಕೃತಿ ಪುರುಷರಿಗೆ ನೈವೇದ್ಯ ಕೊಟ್ಟು ತಮ್ಮನ್ನು ರಕ್ಷಿಸುವಂತೆ ಬೇಡಿಕೊಳ್ಳುವ ಆಚರಣೆ ಕ್ರಮೇಣ ಆರಿದ್ರಮಳೆ ಹಬ್ಬ ವಾಗಿ ರೂಢಿಯಾಯಿತು. ಈ ಉತ್ಸವದ ನೆನಪಿಗಾಗಿ ಸಂಬ್ರಮದ ಕುಣಿತ ಮಾಡುತ್ತಾ ಸ್ನೇಹಿತರು, ಸಂಬಂಧಿಗಳೆಲ್ಲಾ ಕೂಡಿ-ಕಲೆತು ಆಚರಿಸುವ ಈ ದೇಶೀ ಉತ್ಸವವೇ ಆರಿದ್ರಮಳೆ ಹಬ್ಬ.

ರಾಜರೊಂದಿಗೆ ಸೈನಿಕರಾಗಿರುತಿದ್ದ ಜನಸಾಮಾನ್ಯರು ರಾಜಪುತ್ರ ಪರಾಕ್ರಮಿ ಕುಮಾರರಾಮನೇ ತಮ್ಮ ಆದಿ ಪುರುಷ, ಆತನ ತ್ಯಾಗ, ಧೀರತನ, ಸಾಹಸ, ವೀರತ್ವಗಳೇ ಈ ಜನರ ಆರಾಧನೆಯ, ಗೌರವದ ಅಂಶಗಳೆಂದು ಅರಿತು ಧೀರತ್ವ, ವೀರತ್ವ, ಶೂರತನ, ತ್ಯಾಗಗಳಿಗೆ ಸಂಕೇತವಾಗಿ ಕುಮಾರರಾಮನನ್ನು ಆರಾಧಿಸುತಿದ್ದವರು ಈಗ ತುಸು ಬದಲಾವಣೆಗಳನ್ನೂ ಮಾಡಿಕೊಂಡಿದ್ದಾರೆ.

ಸಾಗರ-ಸಿದ್ಧಾಪುರ ಶಿರಸಿಗಳ ಕೋಲಶಿರ್ಸಿ, ಹುಸೂರು, ಅವರಗುಪ್ಪಾ,ಮನಮನೆ,ಕುಗ್ವೆ ಸೇರಿದ ಬಹುತೇಕ ಹಳ್ಳಿಗಳಲ್ಲಿ ಪ್ರತಿವರ್ಷ ಆರಿದ್ರ ಮಳೆಯಲ್ಲಿ ಆಚರಿಸುವ ಈ ಹನಿಹಬ್ಬದಲ್ಲಿ ಗ್ರಾಮದ ದೇವರನ್ನು ಪೂಜಿಸುವ ಜೊತೆಗೆ ಗ್ರಾಮದೇವತೆಗಳು, ಊರದೇವರುಗಳು ಸೇರಿದ ತಮ್ಮ ಹಿಂದಿನ ಸ್ತ್ರೀ, ಪುರುಷ ಮಾದರಿಗಳನ್ನೇ ಪೂಜಿಸುವ ಮೂಲಕ ಆರಾಧಿಸಿ ತಮ್ಮ ಬದುಕು, ಸಂಸ್ಕೃತಿ, ಆಚರಣೆಗಳಿಗೂ ವ್ಯಾಪಾರಿ ವೈದಿಕ ಆಚರಣೆಗಳಿಗೂ ಸೂತ್ರ-ಸಂಬಂಧಗಳಿಲ್ಲ ಎಂಬುದನ್ನು ಪ್ರತಿಬಿಂಬಿಸುವುದರಿಂದ ಈ ಆಚರಣೆ ಸಾಂಪ್ರದಾಯಿಕ, ಜನಾಂಗೀಯ ಭಿನ್ನತೆಗಳಿಂದಲೂ ವಿಶಿಷ್ಟ. ಜೂನ್‌ ಅಂತ್ಯ, ಜುಲೈ ಪ್ರಾರಂಭದ ವಾರದಲ್ಲಿ ಆಚರಿಸಿದ ಈ ಆರಿದ್ರಮಳೆ ಹಬ್ಬದಲ್ಲಿ ಸಿದ್ಧಾಪುರ ಹೊಸೂರಿನಲ್ಲಿ ಬೊಮ್ಮ ದೇವರ ಮೆರವಣಿಗೆ, ಹಣ್ಣು ಕಾಯಿ ಅರ್ಪಣೆಗಳು ನಡೆದವು.

ಕೋಲಶಿರ್ಸಿಯಲ್ಲಿ ಸಾವಿನ ಸೂತಕದ ಹಿನ್ನೆಲೆಯಲ್ಲಿ ಈ ವರ್ಷ ಸರಳವಾಗಿ, ವಿಳಂಬವಾಗಿ ಹನಿ ಹಬ್ಬ ಆಚರಿಸಲಾಯಿತು. ಪ್ರತಿವರ್ಷ ಬಹುವಿಶಿಷ್ಟವಾಗಿ ಆರಿದ್ರಮಳೆ ಹಬ್ಬ ಆಚರಿಸುವ ಅವರಗುಪ್ಪದಲ್ಲಿ ಈ ವರ್ಷವೂ ಈ ಹಬ್ಬ ವಿಜೃಂಬಣೆಯಿಂದ ನಡೆಯಿತು.

ನವವಧುವರರು ದೇವರ ರೂಪಗಳ ವಿಭಿನ್ನ ಮುಖವಾಡ ಹೊತ್ತು ಕೆಂಡತುಳಿಯುವ ಆಚರಣೆ ಮೂಲಕ ತ್ರೈಮಾಸಿಕ ಉಪವಾಸ ಆಚರಿಸುವುದೂ ಈ ಹಬ್ಬದ ವೈಶಿಷ್ಟ್ಯವೆ.