ಪ್ರವಾಸಿಗರ ಸ್ವರ್ಗಸದೃಶ ದೇವರ ತೋಟ ಇರುವುದೆಲ್ಲಿ ಗೊತ್ತೆ ?

ದೇವರು ರುಜು ಮಾಡಿದನು ಅದನು ಕವಿ ನೋಡಿದನು ಎಂದು ಹೇಳಿದ್ದು ಕವಿ ಕುವೆಂಪು. ಇಂಥ ದೇವರ ರುಜು ಹಕ್ಕಿಗಳ ಹಾರಾಟವನ್ನು ನೋಡಲು ನೀವು ದೇವರ ತೋಟಕ್ಕೆ ಹೋಗಬೇಕು. ಹೌದು ದೇವರ ತೋಟ ಎಲ್ಲಿದೆ? ಏನಿದರ ವಿಶೇಶ ಎಂದು ನೀವೂ ತಲೆಕೆರೆದುಕೊಳ್ಳಬಹುದು. ದೇವರ ತೋಟ ಎಂದರೆ ದೇವಭಾಗ, ಈ ದೇವಭಾಗ ಕರ್ನಾಟಕದ ಕಾಶ್ಮೀರ ಕಾರವಾರದಲ್ಲಿದೆ.

ಗೋವಾ ಮತ್ತು ಕಾರವಾರವನ್ನು ವಾಸ್ತವದಲ್ಲಿ ಕರ್ನಾಟಕ ಮತ್ತು ಗೋವಾವನ್ನು ಜೋಡಿಸುವ ಕಾಳೀ ಸೇತುವೆ ಕಾರವಾರದಲ್ಲಿದೆ. ಅದರ ಮೇಲೆ ವಾಹನದಲ್ಲಿ ಅಥವಾ ಅದರ ಕೆಳಗೆ ದೋಣಿ ಬೋಟ್‌ ಗಳಲ್ಲಿ ಹೋದರೆ ಕಣ್ಣಳತೆ ದೂರದಲ್ಲೇ ಸಿಗುವುದು ದೇವಭಾಗ,
ದೇವಭಾಗ ಎಂದರೆ ಕನ್ನಡದಲ್ಲಿ ದೇವರ ತೋಟ ಎಂದರ್ಥ. ಇಂಥ ದೇವಭಾಗದ ಬಗ್ಗೆ ಅದ್ಭುತ ಕವಿತೆ ಬರೆದಿದ್ದ ಬಂಡಾಯ ಕವಿ ದಿವಂಗತ ಚಂಪಾ ದೇವಭಾಗ ಹೆಸರಿನಲ್ಲೇ ಕವನ ಸಂಕಲನ ಹೊರತಂದಿದ್ದರು.

ಸಾಹಿತಿಗಳು,ಕವಿಗಳು ಸಿನೆಮಾ ತಾರೆಯರು, ಕಲಾವಿದರ ಸೇರಿದ ಎಲ್ಲರನ್ನೂ ಆಕರ್ಷಿಸುವ ದೇವಭಾಗದ ಸೌದರ್ಯವೇ ಆ ತೆರನಾದದ್ದು. ಒಂದೆಡೆ ಸಮುದ್ರಸೇರುವ ಕಾಳಿ ಸಂಗಮ ಅದರ ಪಕ್ಕವೇ ದೇವಘಡ, ಕುರುಮ್ ಘಡಗಳೆನ್ನುವ ದ್ವೀಪಗಳು ಈ ಸ್ವರ್ಗಸದೃಶ ಸೌದರ್ಯ ನೋಡಲು ಕಣ್ಣುಗಳೇ ಸಾಲುವುದಿಲ್ಲ. ಜೊತೆಗೆ ದೋಣಿ ವಿಹಾರ, ಬೋಟಿಂಗ್‌, ಕ್ಯಾಂಪ್ಫೈರ್‌, ರೆಸಾರ್ಟ್‌ ಇಂಥ ವಿರಳ ಸೌಂದರ್ಯ, ಅನುಕೂಲಗಳ ಈ ಪ್ರದೇಶ ಪ್ರವಾಸಿಗರಿಗೆ,ಸ್ಥಳಿಯರಿಗೆ ಮುಕ್ತವಾಗಿದೆ.‌

ಅರಣ್ಯ ಇಲಾಖೆ ಇಲ್ಲಿ ಜಂಗಲ್‌ ಲಾಜ್‌ ರೆಸಾರ್ಟ್‌ ಮಾಡಿ ಜನರನ್ನು ಕರೆಯುತ್ತಿದೆ. ದೂರದೂರದಿಂದ ಇಲ್ಲಿಗೆ ಪ್ರವಾಸಕ್ಕೆ ಬರುವ ಪ್ರವಾಸಿಗರು ಈ ಸೊಬಗನ್ನು ಸವಿದು ಕತೆ ಬರೆದು,ಕವನ ಹೆಣೆದು ಸುಖಿಸುತ್ತಾರೆ. ದೇವಭಾಗ ಹೆಸರಿಗೆ ತಕ್ಕಂತೆ ದೇವ ರ ತೋಟದಂತಿರುವ ಈ ಪ್ರವಾಸಿಸ್ಥಳದಲ್ಲಿ ತಂಗುವ ಜನರು ಇಲ್ಲಿಂದ ಡಾಲ್ಪಿನ್‌ ವೀಕ್ಷಣೆಗೂ ತೆರಳುತ್ತಾರೆ. ನದಿ,ಕಡಲು ಹರಿದು ಕೂಡಿ ದ್ವೀಪಗಳನ್ನು ಸೃಷ್ಟಿಸಿ ಸ್ವರ್ಗಕ್ಕೇ ಸವಾಲು ಹಾಕುವ ಈ ನಿಸರ್ಗ ಪ್ರತಿಯೊಬ್ಬರೂ ನೋಡಲೇಬೇಕಾದ ಸ್ಥಳ.  ದೇವರತೋಟ ದೇವಭಾಗ ಈಗ ಎಲ್ಲರನ್ನೂ ಕೈ ಬೀಸಿ ಕರೆಯುತ್ತಿದೆ ನೋಡಿ ಬನ್ನಿ.
(ಕನ್ನೇಶ್‌ ಕೋಲಶಿರ್ಸಿ)